Школярски стандард у АП Войводини
Установи школярского стандарду на териториї АП Войводини
Обласц школярского стандарду на териториї АП Войводини реґулована зоз Законом о школярским и студентским стандарду («Службени глашнїк РС», число 18/2010, 55/2013, 27/2018 – др. закон и 10/2019), Законом о утвердзованю компетенцийох Автономней покраїни Войводини («Службени глашнїк РС», число 99/2009 и 67/2012 – одлука УС), Правилнїком о змесценю и костираню школярох и студентох («Службени глашнїк РС», число 36/2019), Правилнїком о програми воспитней роботи у домох школярох штреднїх школох («Службени глашнїк РС», число 20/97), Правилнїком о нормативох и стандардох за окончованє дяїлносци у установох школярского и студентского стандарду («Службени глашнїк РС», число 31/2024), Одлуку о способе роботи домох школярох и штреднїх школох зоз домом школярох зоз шедзиском на териториї Автономней покраїни Войводини («Службени новини АПВ», число 8/2006) и Правилнїком о способе и поступку розподзельованя местох у домох школярох и штреднїх школох зоз домом школярох зоз шедзиском на териториї АП Войводини («Службени новини АПВ» , число 13/2003 и 19/2007).
Школярски стандард подрозумює:
• доми школярох;
• змесценє и костиранє школярох штреднїх школох у школярских домох;
• кредити и стипендиї за школярох штреднїх школох;
• реґресованє трошкох превоженя школярох штреднїх школох.
Доми школярох у АП Войводини
На териториї АП Войводини ше находзи тринац доми за змесценє и костиранє школярох штреднїх школох. Як установи школярского стандарду реґистроване осем доми: два у Новим Садзе, по єден у Суботици, Зомборе, Вершцу, Сримскей Митровици, Кикинди и Зренянину.
Други доми школярох у рамикох штреднїх школох и функционую як услужнa дїялносц школох, а директоре штреднїх школох тиж и директоре домох школярох (Технїчна школа зоз домом школярох – Апатин, Польопривредна школа зоз домом школярох – Футоґ, Ґимназия зоз домом школярох «Петро Кузмяк» – Руски Керестур, Ґимназия «Ян Колар» зоз домом школярох – Бачки Петровец и Ґимназия за талантованих школярох «Боляи» у Сенти).
Доми школярох при штреднїх школох ше хаснує углавним за змесценє школярох штреднїх школох при яких исную.
Доми школярох штреднїх школох хтори ше находза на териториї Автономней Покраїни Войводини
Змесценє и костиранє школярох штреднїх школох у школярских домох
Право на змесценє и костиранє у установи за змесценє и костиранє школярох маю порядни школяре штреднїх школох, на основи конкурса.
Министерство просвити Републики Сербиї, найпознєйше три мешаци пред початком школского рока розписує, конкурс за приєм школярох до домох школярох. У конкурсу ше оглашує условия за приєм, число розполагаюцих местох, потребни документи и термини за приявйованє на конкурс.
Кредити и стипендиї за школярох штреднїх школох
Право на школярски кредит маю порядни школяре штреднїх школох хтори ше школую за дефицитарни занїманя, на основи конкурсу Министерства просвити.
Право на школярски кредит ше витворює у мешачней пенєжней суми хтора виноши найменєй як сума учасци школярох у цени змесценя и костираня у дому школярох.
Министерство просвити, найпознєйше три мешаци пред початком школского року, розписує конкурс.
Право на школярску стипендию маю порядни школяре штреднїх школох хтори посцигли одлични успих през школованє, на основи конкурсу. Стипендию ше додзелює без обовязки врацаня.
Конкурс Министерства просвити ше розписує найпознєйше три мешаци пред початком школского року.
Зоз конкурсом ше оглашує условия за додзельованє стипендиї, число стипендистох, суму стипендиї, потребни документи и термини за приявйованє на конкурс. Рядошлїд школярох за додзельованє стипендиї ше утвердзує на основи успиху школярох у предходним школованю и на основи приходох фамелиї школяра.
Реґресованє трошкох превоженя школярох штреднїх школох
Покраїнски секретарият за образованє, предписаня, управу и национални меншини – национални заєднїци окончує реґресованє трошкох превоженя школярох штреднїх школох зоз териториї АП Войводини на основи Закона о утвердзованю компетенцийох Автономней Покраїни Войводини („Службени глашнїк РС”, число 99/2009 и 67/12 – УС РС), Покраїнскей скупштинскей одлуки о буджету АП Войводини за 2021. рок („Службени новини АПВ”, число 66/2020), Покраїнскей скупштинскей одлуки о додзельованю буджетних средствох за финансованє и софинансованє програмних активносцох и проєктох у обласци основного и штреднього образованя и воспитаня и школярского стандарду у Автономней Покраїни Войводини („Службени новини АПВ“, число 14/2015 и 10/2017), Покраїнскей скупштинскей одлуки о покраїнскей управи („Службени новини АПВ”, число 37/2014, 54/2014 – др. одлука, 37/2016, 29/2017, 24/2019 и 66/2020) и Правилнїка о способе применьованя утвердзених критериюмох за реґресованє превоженя школярох штреднїх школох хтори мож найсц на интернет-боку Покраїнского секретарияту за образованє, предписаня, управу и национални меншини – национални заєднїци.
Покраїнски секретарият за образованє, предписаня, управу и национални меншини – национални заєднїци преноши средства за реґресованє превоженя школярох штреднїх школох општином и городом, хтори, на основи своїх критериюмох, розпоредзую средстава остатнїм хасновательом, школяром-путнїком зоз своєй териториї (виплацованє у готовим пенєжу або преношенє средствох превознїкови).
Право на реґресоване превоженє маю школяре штреднїх школох зоз териториї АП Войводини, хторим место биваня на подручу општини зоз териториї АП Войводини и хтори каждодньово путую од места биваня по место установи образованя.
За блїзши информациї заинтересовани школяре-путнїки можу ше явиц компетентним орґаном у своїх општинох.