Почал шеснасти циклус змаганя квизу „Кельо ше познаме“
Шеснасти циклус змаганя квизу „Кельо ше познаме“ почал нєшка у Сенти, дзе екипи з осем штреднїх школох з териториї АП Войводини укажу кельо знаю о култури своїх сонароднїкох. Тот квиз часц проєкту Покраїнскей влади под назву „Афирмация мултикултурализму и толеранциї у Войводини – мири за моцнєнє медзисобного довирия при младих” и циль му промоция мултикултурализму и толеранциї починаюци од 2005. року.
„Циль тей активносци то едукация жительства, насампредз младих, о заєднїцкей историї и култури рижних националних заєднїцох хтори жию у Войводини, з твореньом условийох за таку едукацию през масовне уключованє школярох штреднїх школох зоз АП Войводини. Змаганє було отворене за шицких штредньошколцох, а за квиз ше пририхтовали з публикациї „Войводянски мозаїк“ хтору видал наш секретарият.” – виявел подпредсидатель Покраїнскей влади, покраїнски секретар за образованє, предписаня, управу и национални меншини – национални заєднїци Роберт Отот.
Як и у предходних циклусох и тогорочне змаганє подрозумює вецейязичносц – можлївосц же би школяре, у зависносци од язика хтори ше хаснує у настави, у квизу чули питаня и дали одвити на своїм язику. Так ше стимулує приявйованє школох у хторих ше наставу тримa на язикох националних меншинох – националних заєднїцох. У тим циклусу, учашнїки ше буду змагац на сербским, мадярским, словацким и горватски язику.
Квалификацийни змаганя ше отрима у тим тижню у Мужлї, Старей Пазови и Суботици, a полуфиналe и финале заказани за конєц мая 2024. року. У предходних петнац циклусох того змаганя, учествовали вкупно 715 екипи и 2.833 змагателє, а шицко тото провадзели 30.000 патраче – симпатизере зоз школох хтори ше змагали.
