Винчованка з нагоди Шветового дня културней рижнородносци за диялоґ и розвой
Зоз Общу декларацию о културней рижнородносци, держави швета припознали културну рижнородносц як заєднїцку вредносц, з цильом же би ше у шицких штредкох и каждим дружтву почитовало и промововало културну рижнородносц, з оглядом же така рижнородносц, толеранция, диялоґ и почитованє рижнородносци творя фундаментални вредносци модерного дружтва, без яких анї єдна заєднїца нє може анї отримац ше, анї напредовац.
Од 2002. року, за Шветови дзень културней рижнородносци за диялоґ и розвой преглашени 21. май.
Автономна покраїна Войводина подруче на хторим числени национални заєднїци виками и каждодньово хасную свойо права и пестую дух уважованя културней рижнородносци и диялоґу. У такей атмосфери, диялоґ и сотруднїцтво нєзаобиходни и на завидним су уровню и представяю основу за дальши културни и вкупни дружтвени розвой покраїни. Прето, Покраїнски орґани дошлїдно робя на унапредзованю и защити културней рижнородносци шицких заєднїцох хтори жию у покраїни. Тото доказує и робота и активносци покраїнских орґанох хтори през цали рок – з явнима конкурсами, явнима оглашками, програмами, проєктами и поволанками – промовую розвой културней рижнородносци, дружтвеного диялоґу, мултикултуралносци и интеркултуралносци покраїни. Зоз тим ше потвердзує освидоменосц у означованю културолоґийних рижнородносцох, пестованю медзисобного розуменя, толеранциї и гармониї медзи розличнима заєднїцами хтори жию у Автономней покраїни Войводини.
Свидоми факту же културна рижнородносц и диялоґ предусловиє дальшого дружтвеного розвою, яки фундаментовани на соживоту, медзисобним почитованю, розуменю и прилапйованю, з надїю же и у будучносци предлужиме почитовац и пестовац тоти вредносци, винчуєм шицким Шветови дзень културней рижнородносци за диялоґ и розвой.
Покраїнски секретар,
Роберт Отот