За роботу националних совитох у АП Войводини додзелєни 80 милиони динари
Предсидателька Покраїнскей влади Мая Ґойкович, вєдно зоз подпредсидательом и покраїнским секретаром за образованє, предписаня, управу и национални меншини – национални заєднїци Робертом Ототом, уручела нєшка представительом 17 националних совитох националних меншинох зоз АП Войводини контракти о додзельованю средствох за софинансованє їх дїялносци у 2025. року.
Вкупно 80 милиони динари опредзелєни за стаємни трошки националних совитох, як и за трошки рядовей дїялносци – за програми и проєкти у обласци образованя, култури, информованя и службеного хаснованя язика и писма националней меншини и финансованє роботи установох, фондацийох и привредних дружтвох, чий снователь або соснователь, або чийо сновательни права часточнє або у цалосци пренєшени на Совит.
Предсидателька Ґойкович визначела же додзелєни средства медзи найлєпшима указателями полного почитованя принципу витворйованя шицких заґарантованих правох националних меншинох у Републики Сербиї и Автономней покраїни Войводини.
„О тим кельо Покраїнскей влади важне же би национални совити предлужели пилно робиц на витворйованю своїх цильох, шведочи и факт же нєшка додзелюєме найвисшу суму средствох зa остатнї 11 роки“, виявела Ґойковичова и додала же нєшкайше додзельованє ма и символичну значносц, бо бешедує о виковним соживоце шицких народох на тих просторох.
Предсидателька здогадла на тото же Покраїнска влада уж дзешец роки видвоює средства за роботу националних совитох.
„Од 2015. року за тоту наменку видвоєни вецей як 700 милиони динари зоз покраїнского буджету, а нєшка контракти додзелюєме векшому числу хасновательох як скорей. Шицко тото шведочи о добрим напряме политики хтору у тей обласци водзи Покраїнска влада, хтора унапрямена на тото же би кажди национални совит могол цо самостойнєйше ношиц ше зоз спокусами и буц цо креативнєйши у афирмованю идейох и реализациї проєктох од интереса за национални меншини“, поручела предсидателька Ґойкович.
У одношеню на 2024. рок, у чечуцим року зоз покраїнского буджету видвоєни дзешец милиони динари вецей за тоту наменку.
На додзельованю бешедовал и подпредсидатель и покраїнски секретар за образованє, предписаня, управу и национални меншини – национални заєднїци Роберт Отот хтори визначел же ше на таки способ потвердзує пошвеценосц Покраїнскей влади очувац идентитет и права шицких заєднїцох у Войводини.
„Наша покраїна приклад соживота, порозуменя и медзисобного почитованя, а национални совити националних меншинох маю нєпреценїву улогу у очуваню тих вредносцох“, гварел подпредсидатель Отот.
Жридло: Покраїнска влада
