25. новембер, Медзинародни дзень борби процив насилства над женами
Насилство над женами и далєй представя єдно з найрозширенших и найчежших потупеньох людских правох, на цо спозорюю найновши преценьованя Шветовей здравственей орґанизациї по хторих скоро кажда треца жена - коло 840 милиони ширцом швета, под час живота прежила партнерске або сексуалне насилство, а тото число ше од 2000. року скоро нє пременєло. Лєм у остатнїх 12 мешацох, 316 милиони жени, односно 11% старших як 15 роки, були виложени физичному або сексуалному насилству од интимного партнера. Напредованє барз спомалшене и виноши шицкого 0,2% рочнє у остатнїх двох деценийох.
Медзинародни дзень борби процив насилства над женами, 25. новембер, нагода же би ше ище раз указало на проблем насилства над женами и намаганя хтори ше поднїма за його зоперанє и творенє условийох за безпечни живот шицких женох и шицких особох хтори прежили насилство у фамелиї.
У рамикох кампанї «16 днї активизму процив насилства над женами», хтора тирва од 25. новембра по 10. децембер, ширцом швета ше запровадзує активносци хтори доприноша зопераню насилства.
Розвой технолоґиї принєсол и нови форми малтретованя, диґиталне насилство, хторе постава єден з найчастейших способох нападаня на жени. Воно служи же би ше уцихло, застрашело и дискредитовало жени у явним просторе. Найбаржей виложени новинарки, активисткинї, политичарки, як и дзивчата и млади жени активни на интернету.
«ЗЄДИНЬМЕ ШЕ же бизме застановели диґиталне насилство над женами и дзивчатми» тема тогорочней ґлобалней кампанї прето же:
• число приявох континуовано рошнє,
• постояци закони нєдостаточно щица жертви або ше их нє применює у достаточней мири,
• механїзми швидкей реакциї и потримовки нє досц розвити,
• технолоґийни платформи часто керую одвичательносц,
• злохаснованє штучней интелиґенциї ноши нови ризики и вимага потупеня права.
Форми диґиталного насилства можу облапяц:
• нєовласцене дзелєнє интимних змистох,
• сексуалне знємирйованє на интернету,
• гроженя, тролованє и бешеду мержнї,
• „deepfake“ порноґрафию,
• злохаснованє особних податкох, провадзенє и фалшиве представянє.
За ефикасне зоперанє диґиталного насилства нєобходни мултидисциплинарни приступ и правни рамик хтори ясно препозна и инкриминує шицки форми насилства у диґиталней сфери и обезпечи їх санкцию. Жертвом диґиталного насилства треба обезпечиц доступни услуги потримовки, а тиж потребни кампанї дзвиганя свидомосци хтори оможлївя препознаванє, розуменє и указованє на розширеносц и чкодлївосц диґиталного насилства.
Покраїнски омбудсман здогадує же державни орґани маю обовязку застановиц и санкционовац насилство над женами и же защита жертвох дїлотворна лєм кед є институционално повязана и дошлїдно применєна. Прето уж 20 роки координує роботу Мрежи «Живот без насилства», з цильом моцнєня сотруднїцтва и координациї институцийох и ефикаснєйшого применьованя законох. Мрежа облапя институциї у АП Войводини хтори ше занїмаю зоз защиту од фамелийного и родно заснованого насилства (центри за социялну роботу, правосудни орґани, полицию, здравствени и образовни установи, покраїнски институциї и других актерох системи защити).
Мрежа «Живот без насилства» ше придружує ґлобалней инициятиви UNiTE и поволує институциї, орґанизациї и гражданох же би допринєсли зопераню диґиталней и каждей другей форми насилства над женами и дзивчатами.