Винчованка з нагоди Медзинародного дня мацеринского язика
Медзинародни дзень мацеринского язика ше означує 21. Фебруара, од 1999. року кед го установела орґанизация УНЕСКО, а зоз резолуцию потвердзела Ґенерална скупштина Зєдинєних нацийох.
Тот дзень ма винїмкову значносц и зоз окремну увагу ше го означує у Автономней покраїни Войводини, подручу на хторим ше язичну пестросц осторожно чува и пестує. Покраїна дошлїдно промовує политику вецейязичносци и свидомосц о значносци мацеринского язика прейґ числених активносцох, програмох, проєктох и каждодньову роботу покраїнских орґанох.
Войводина простор дзе вецей як 25 национални заєднїци хасную свойо мацерински язики у приватней, явней и службеней комуникациї и дзе у єдинкох локалней самоуправи, попри сербского язика у службеним хаснованю ище 10 меншински язики, а 12 мацерински язики ше виучує у рамикох образовней системи.
Покраїнска влада ше континуовано и витирвало занїма зоз унапредзованьом и защиту вецейязичносци у покраїни у шицких дружтвених одношеньох зоз стимулованьом ученя мацеринских язикох, а насампредз меншинских язикох. Пестованє и очуванє мацеринских язикох представя єден зоз цильох и будуцих активносцох покраїнскей влади, насампредз у обласци образованя, при дзецох и младих, з оглядом на тото же вони чуваре и будучносц мацеринских язикох у нашей покраїни.
Зоз таким чувством, винчуєм шицким Медзинародни дзень мацеринского язика.
ПОКРАЇНСКИ СЕКРЕТАР,
Роберт Отот