Роберт Отот, подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци

Роберт Отот народзени 2. мая 1984. року у Сенти. У Сенти закончел Економско-тарґовинску школу. Року 2012. дипломовал на Правним факултету за привреду и правосудство у Новим Садзе и здобул фахову назву дипломованого правнїка.

Од януара 2013. року роби у Општинскей управи у Новим Кнежевцу як самостойни фахови сотруднїк. Од 2014. по 2021. рок у Ґимназиї и фаховей школи «Доситей Обрадович» у Новим Кнежевцу преподава предмети Устав и права гражданох и Социолоґия з правами гражданох. Од 2014. по 2018. рок бул подпредсидатель Одбору за службене хаснованє язика и писма Националного совиту мадярскей националней меншини, а по тим и член одбору од 2023. року. У 2016. року кратки час окончує функцию секретара Скупштини општини Нови Кнежевац. Од 2016. по 2024. рок є заменїк покраїнского секретара за польопривреду, водопривреду и лєсарство. Активно участвує у роботи цивилних орґанизацийох и културно-уметнїцких дружтвох на териториї општини Нови Кнежевац.

Член є Союзу войводянских Мадярох од 2003. року. Року 2019. є вибрани за предсидателя месного одбору странки у Новим Кнежевцу. Жиє у Новим Кнежевцу.

Оженєти є, оцец єдного дзецка.

Сладяна Бурсач, заменїк покраїнского секретара за образованє, предписаня, управу и национални меншини - национални заєднїци

Сладяна Бурсач народзена 1972. року у Крнєшевцох, општина Стара Пазова. Року 1991. закончела Штредню педаґоґийну школу, после хторей у Беоґраду закончела Педаґоґийну академию 1993. року, а званє професора класней настави здобула на Учительским факултету у Зомбору Универзитету у Новим Саду 2004. року. Фахови испит за наставнїка класней настави положела 1996. року. Мастер академски студиї Лидерство у образованю нащивйовала на Факултету педаґоґийних наукох у Яґодини Универзитету у Краґуєвцу. Испит за лиценцу директора школи положела 2020. року.

Сладяна Бурсач здобувала роботне искуство як учителька у ОШ „Милан Хаджич“ у Войки од 1995. року до 2009. року. Року 2009. менована є за окончователя директора новооснованей Основней школи „Симеон Араницки“ у Старей Пазови и директорка тей школи була у трох мандатох, од 2010. до 2022. року.

Под час мандату Сладяни Бурсач на месту директора ОШ „Симеон Араницки“ тота школа оценєна з найвисшу оцену на екстерней евалуациї и, як єдна од дзешец школох чию роботу Министeрство просвити, науки и технолоґийного розвою охарактеровало як вершинску, уключена є до проєкту „3П – Препознай, промовуй и прешир“. Сладяна Бурсач уключела ОШ „Симеон Араницки“ до велького числа проєктох хтори ше занїмаю з розвойом професионалней ориєнтациї и поднїмательства („Професионална ориєнтация“ – ҐИЗ и „Поднїмательни школи“), еколоґию и защиту животного штредку (Проєкт „Мрежи еко-школох“ и „За чистейши и желєнши школи у Войводини“), диґитализацию у просвити („Потримовка розвою людского капиталу и виглєдованя – обще образованє и розвой людского капиталу“, „Мудра школа за мудри дзеци“, „Селфи“, „Диґитализация“), унапредзеньом условийох за розвой спортских активносцох у школох („Спорт до школох“, „Активни школи“, „Стой випросцени – рошнї здраво“, „Карате у настави“, „Здраво рошнїме“), превенцию насилства (УНИЦЕФ-ов проєкт „Школи без насилства“) и професионалним розвойом наставнїкох, сучаснима методичнима приступами и жридлово ориєнтованима курикулумами (проєкти Министерства просвити „Развионица“ и „Унапредзованє квалитету настави – розвой ключних компетенцийох прейґ мултидисциплинарного приступу – Зоз сотруднїцвом до знаня“). Школа, тиж, 2021. року участовавала и у медзинародним виглєдованю читательней писменосци – PIRLS. Участвує у роботи Мрежи потримовки инклузивному образованю.

Бешедує по русийски и анґлийски.

E-mail: sladjana.bursac@vojvodina.gov.rs