Софинaнсовaнє eтнїчних зaєднїцох
Таку файту финансийней потримовки ше дава спрам можлївосцох буджету АП Войводини, а на основи Покраїнскей скупштинскей одлуки о додзельованю буджетних средствох за унапредзенє положеня националних меншинох – националних заєднїцох и розвой мултикултурализма и толеранциї («Службени новини АПВ», число 8/2019).
Право на додзельованє буджетних средствох Покраїнского секретарияту за унапредзованє положеня националних меншинох – националних заєднїцох маю здруженя, фонди и фондациї припаднїкох националних меншинох – националних заєднїцох, хтори маю реґистроване шедзиско на териториї АП Войводини.
Право на додзельованє буджетних средствох Покраїнского Секретарияту за розвой мултикултурализма и толеранциї маю здруженя, фонди и фондациї, чийо проєкти и програми унапрямени на очуванє и пестованє медзинационалней толеранциї и хтори маю реґистроване шедзиско на териториї АП Войводини.
Право на додзельованє буджетних средствох Покраїнского секретарияту за унапредзованє положеня особох хтори припадаю ромскей националней меншини маю здруженя, фонди и фондациї ромскей националней заєднїци, хтори маю реґистроване шедзиско на териториї АП Войводини.
Секретарият розписує найменєй по єден конкурс рочнє за додзельованє средствох. На тот способ ше участвує у софинансованю програмох и проєктох здруженьох, фондох и фондацийох хтори, насампредз, унапрямени на: витворйованє правох националних меншинох – националних заєднїцох; мултикултуралносц, з цильом розвиваня духа толеранциї; афирмативни мири за злєпшованє положеня особох цо припадаю ромскей националней меншини; очуванє и пестованє язика, народних обичайох и старих ремеслох; защиту и презентацию фолклорного нашлїдства; творенє условийох за розвой култури, науки и уметносци; пестованє и стимулованє народней творчосци; представянє културних доброх од винїмкового значеня; литературну, драмску, сценску, музичну и подобову творчосц, меморияли, фестивали, ювилейни манифестациї, уметнїцки колониї, кампи з якима ше пестує толеранция и права националних меншинох – националних заєднїцох; конференциї, турнири, сходи и тому подобне, з якима ше пестує толеранция и права националних меншинох – националних заєднїцох; пестованє и розвой аматеризму; госцованє ансамблох; сотруднїцтво з матичнима жемами и други форми сотруднїцтва.
Текст конкурса ше обяви у шицких новинох на язикох меншинских националних заєднїцох у АП Войводини, як и на тим веб-боку, а о нїх информує и найтиражнєйша преса на сербским язику.
О конєчним додзельованю розполагаюцих средствох одлучує покраїнски секретар по обезпеченим думаню националних совитох, односно окремней конкурсней комисиї у случаю приявох о хторих ше национални совити нє вияшнєли у предвидзеним чаше, приявох орґанизацийох припаднїкох националних меншинох – националних заєднїцох цо нє сновали национални совит, як и приявох других орґанизацийох хтори у складзе зоз одлуку маю право на додзельованє тих средствох.
Покраїнска скупштинска одлука о додзельованю буджетних средствох за унапредзованє положеня националних меншинох – националних заєднїцох и розвой мултикултурализма и толеранциї