Винчованка Михаля Нїлаша з нагоди початку школского 2020/2021. року
Почитовани просвитни роботнїки и колеґинї и колеґове, мили нашо школяре!
Початок того школского року дочекаме на по вельо чим нєконвенционалнєйши способ як цо зме могли предпоставиц лєм пред єдним роком. Но, велькосц чловека ше спатра у звладованю шицких препреченьох хтори живот пред нас кладзе, як и у пренаходзеню нових ришеньох же би ше посцигло заєднїцки циль ґу хторому ше намагаме, цо у нашим случаю – здобуванє знаня и образованя.
Хвилькова епидемиолоґийна ситуация зоз собу принєсла и вименєни, очежани условия роботи так же тот школски рок нє почина зоз веселим жубротаньом у конкох хтори преполни зоз дзецми. Место того, прилапели зме даєдни нови методи роботи и ученя же би ше наставни процес нєзавадзано одвивал, бо здравє и безпечносц, вшелїяк, на першим месце. Прешвечели зме ше до того же ученє то процес у хторим участвую и школяре, алє и їх учителє и наставнїки, прилапююци нови знаня и нови схопносци же би – хаснуюци информацийну технолоґию – приблїжели и олєгчали наставу школяром.
Щиро верим же ше шицки тоти нови виволаня и нєсподзивани препреченя успишно звлада, зоз сердечну помоцу учительох, наставнїкох и родичох.
Наш секретарият будзе ваш союзнїк у тим и да вам максималну потримовку на вашей драги ґу реализациї успишного образованя наших дзецох.
Прето, шицким вам жичим успишни наступни школски рок, и наздавам ше же вон – як и кажди предходни рок – будзе виполнєни зоз креативнима роздумованями, здобуванями нових знаньох и схопносцох и твореньом памяткох хтори оставаю за цали живот.
Жичим вам успишни початок и добре здравє!
З почитованьом,
ПОКРАЇНСКИ СЕКРЕТАР,
Михаль Нїлаш