Отворени нови обєкт ОШ „Йован Попович“ у Сримскей Митровици

Нєшка отворени нови обєкт Основней школи „Йован Попович“ у Сримскей Митровици, за чию вибудов и опреманє Покраїнска влада, зоз потримовку локалней самоуправи, видвоєла 382 милиони динари.
Нови обєкт поверхносци коло 4100 квадратни метери, з капацитетом за 1200 школярох, заменєл школу хтора вибудована шейдзешатих рокох и хтора була у барз подлим стану.
„Школски рок школяре Основней школи „Йован Попович“ починаю у нових лавкох у новей школи. За менєй як два роки, вибудовали зме нови обєкт и цалком го опремели, з чим од нєшка витворени условия за сучаснєйшу систему школованя. Тота школа символ нашей будучносци, нашей младосци, символ єдней новей Сербиї хтору шицки вєдно будуєме“, гварел предсидатель Покраїнскей влади Иґор Мирович, по отвераню школи.
Як цо наведол, Покраїнска влада у прешлих штирох рокох реализовала числени проєкти з цильом унапредзеня и злєпшаня условийох школованя у шицких образовних установох.
„Указали зме же ше зоз заєднїцку роботу, збераньом коло проєктох и сотруднїцтвом на шицких уровньох власци може зробиц вельо и на плану образованя. Тото вельки дзень за школярох, учительох, наставнїкох и за шицких занятих тей школи, алє и за цалу Сримску Митровицу“, гварел Мирович и пожадал щешлїви початок школского року шицким школяром.
Министер просвити, науки и технолоґийного розвою Младен Шарчевич, визначел же школа барз добре опремена и же з набавку модерней опреми витворени условия за окончованє сучасней настави.
„През лєто окончени роботи на аж 192 школох у Сербиї, а тота школа єдна з нїх. Твориме найлєпши условия за ученє и одрастанє дзецох, уношиме новини до наставней програми, осучаснюєме наставу и з таким трендом мушиме предлужиц“, виявел министер Шарчевич.
Заменїца городоначалнїка Сримскей Митровици Светлана Милованович, гварела же з отвераньом тей школи витворени сон шицких гражданох Сримскей Митровици, визначуюци же тото зробене дзекуюци Покраїнскей влади и єй предсидательови Иґорови Мировичови.
Оценююци же тота школа єден з найсучаснєйших обєктох такого типу у Сербиї, директор ОШ „Йован Попович“ Слободан Стоїлкович, гварел же нови будинок приноши лєпше ютре за шицких школярох, наставни и други персонал, бо им, як цо наведол, оможлїви лєгчейшу роботу, квалитетнєйши условия за школованє и звладованє наставней материї.
На отвераню школи присуствовали и покраїнски секретар за образованє, предписаня, управу и национални меншини - национални заєднїци Михаль Нїлаш и директор Управи за капитални укладаня АП Войводини Неделько Ковачевич.

Жридло: Покраїнска влада

01.09.2020