61,6 милиони динари за софинансованє активносцох националних совитох за 2021. рок
Подпредсидатель покраїнскей влади, покраїнски секретар Жолт Сакалаш нєшка шветочно уручел представительом националних совитох националних меншинох контракти о додзельованю средствох. За реализацию рочних активносцох 17 националних совитох, хтори маю реґистроване шедзиско на териториї АП Войводини, з покраїнского буджету видвоєни 61,6 милиони динари.
„Вкупни суми хтори того року додзелюєме националним совитом исти як и прешлого року, алє потвердзую постояносц, тенденцию и насампредз опредзелєнє Покраїнскей влади и нашого секретарияту же би ше и убудуце укладало до роботи и розвою националних совитох, зоз часцу и зоз звекшаньом финансийней помоци у будучносци.” – виявел Сакалаш з нагоди шветочного додзельованя контрактох.
Додзелєни пенєжни средства наменєни за софинансованє рядовей дїялносци и стаємних трошкох националних совитох, а будзе ше их виплацовац квартално, у штирох єднаких часцох, по конєц 2021. року.
„Нажаль, и того року, ситуация з пандемию ше нє злєпшує и шицки зме примушени свою роботу, активносци и програми прилагодзиц на таки способ же би припаднїки националних меншинох нє почувствовали очежани условия роботи и же би ше їх права нєзавадзано имплементовали до шицких обласцох живота. Прето обчекуєм же, гоч зме и прициснути з новима очежуюцима обставинами, вєдно зоз заєднїцкима моцами, солидарни и єдинствени, успишно реализуєме шицки тогорочни цилї.” – додал секретар.
Средства додзелєни националним совитом мадярскей, словацкей, румунскей, горватскей, ромскей, рускей, македонскей, чарногорскей, бунєвацкей, ческей, українскей, нємецкей, польскей, ашкалийскей, єгипетскей, греческей и русийскей националней меншини.
