Винчованка з нагоди Медзинародного дня борби процив расней дискриминациї
Медзинародни дзень борби процив расней дискриминациї ше означує 21. марца, на знак здогадованя на подїї кед у Южноафрицкей републики 1960. року забити 69 особи хтори мирно протестовали процив политики апартхейду. Зєдинєни нациї 1966. року тот датум преглашели як швето – символ заєднїцкей борби шицких членох и їх зєдинєних напруженьох же би елиминовали шицки форми расней дискриминациї.
Автономна Покраїна Войводина подруче дзе вецей як двацец и пейц розлични национални меншини – национални заєднїци виками зложно жию и каждодньово хасную свойо права и свойо шлєбоди. Зоз того факту виходзи и потреба же би ше у Войводини пестовало атмосферу уважованя розличносцох – по гоч якей особней прикмети, а насампредз расней и етнїчней припадносци. Зоз тим цильом, Покраїнска влада дошлїдно и витирвало унапредзує и щици людски и меншински права на териториї покраїни, и водзи нєпреривну борбу процив гоч якей файти дискриминациї.
У хвильково чежких обставинох, пре пандемию хороти яка виволана з вирусом корона (COVID-19), можебуц вецей як по тераз, мушиме ше освидомиц же з нами и коло нас жию особи хтори маю подобни животни потреби, намаганя и амбициї, психолоґийни и социолоґийни характеристики, а же особни прикмети нє можу и нє шму буц причина иншакого похопеня о природних правох чловека, о його положеню и потребох у дружтве.
Маюци у оглядзе факт же предрозсудки барз чежко победзиц, и же подполну єднакосц медзи людзми нє лєгко витвориц, шицки покраїнски институциї, у каждодньових активносцох, континуовано ше намагаю же би таке дискриминаторне справованє, нєоправдане правенє розликох и справованє фундаментоване на предрозсудкох, мержнї и нєтолеранциї елиминовали на подручу покраїни.
Зоз надїю же ше у будучносци голєм приблїжиме ґу идеалу єднакосци медзи людзми, винчуєм вам Медзинародни дзень борби процив расней дискриминациї.
Покраїнски секретар,
Жолт Сакалаш