Нащива општини Жабель

Предсидатель Покраїнскей влади Иґор Мирович, подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Жолт Сакалаш и покраїнски секретар за польопривреду, водопривреду и лєсарство Чедомир Божич нащивели нєшка општину Жабель, дзе нащивели ОШ „Жарко Зренянин“ у Господїнцох и Польопривредне ґаздовство „Радишич“ у Чуроґу.

„У општини Жабель зме у прешлих рокох зробели велї конкретни ствари. Єден з важних проєктох то обнова школи у Господїнцох, у хторей зме пред пейцома роками застали назакончену спортску салу, а нєшка маме нє лєм нову салу, алє и обновени цали обєкт“, гварел Мирович.

Дзекуюци потримовки Покраїнскей влади, ОШ „Жарко Зренянин“ зоз 26 милиони динари укладаня у цалосци реконструована, а обновенa и физкултурна сала и спортски терен. Подпредсидатель Покраїнскей влади и покраїнски секретар Жолт Сакалаш визначел же Покраїнска влада велї роки уклада до образовних установох на териториї Войводини. Вон додал же єст ище вельо роботи, бо у Покраїни єст вецей як 550 школи.

Делеґация Покраїнскей влади под час нащиви нащивела и Польопривредне ґаздовство „Радишич“, у чиїх ше рамикох находзи и млєкарня „Фармер“, дзе ше традицийно уж цали вик продукує сири хтори свойо место нашли и на шветовим тарґовищу.

„Тото ґаздовство приклад кельо значи традиция, квалитет и заєднїцке зберанє коло модернизациї продукциї сира“, гварел Мирович и додал же Покраїна дава значни субвенциї за модернизацию продукциї. Вон наглашел же Покраїна нє зменшовала средства за польопривреду у тим року, гоч пандемия без сумнїву уплївовала на економию нашей жеми.

Покраїнски секретар Чедомир Божич гварел же ґаздовство „Радишич“, хторе ше окрем з млєкарством занїма и з продукцию житаркох, добри приклад интензивней продукциї хтору ресорни секретарият зоз своїма мирами потримує. По його словох, ґаздовство хасновало стимулациї за уводзенє стандардох и за опреманє фарми статку, а вредносц инвестицийох то штири милиони динари. Планує ше диґитализацию продукциї, з уводзеньом роботох за доєнє кравох, цо допринєше ґу продуктивносци и ефикасносци роботи.

Предсидатель Општини Жабель Урош Раданович гварел же зоз Покраїни прешли штири роки инвестовани вецей як 400 милиони динари до явней инфраструктури – драгох, транспортнїцох, образовних институцийох и водоводней мрежи.

23.03.2021