Отворени саям образованя «Драгокази»
Нєшка отворени 16. саям образованя «Драгокази», на он-лайн платформи ExpoOnline.rs Новосадского сайма. На сайму участвує вецей як 70 викладаче, хтори помогню школяром коло вибору за упис до штреднїх школох и на факултети. Пре хвилькову епидемиолоґийну ситуацию, саям ше того року перши раз отримує он-лайн, будзе тирвац од 24. по 26. марец 2021. року.
У рамикох шветочного отвераня, учашнїком, медзи иншим, бешеду отримали ґенерални директор Новосадского сайма мр Слободан Цветкович, покраїнски секретар за високе образованє и наукововиглєдовацку дїялносц проф. Др Зоран Милошевич и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Жолт Сакалаш.
«Наш секретарият и того року финансовал участвованє штреднїх школох зоз АП Войводини, чийо презентациї, у складзе з можлївосцами, представени на сайму. Присподобюєме ше обставином яки нїкому нє легки, алє зме єднак пошвецени укладаню до найлєпшей можлївей образовней будучносци. Окреме бим бул радосни зоз даєдним конзервативнєйшим, узвичайнєйшим виданьом сайму уж нарок, дзе бизме мали нагоду ознова ше стретнуц насправди, а нє лєм виртуално.» – гварел Сакалаш з нагоди отвераня.
Як и предходних рокох, спомнути секретарият предлужел сотруднїцтво зоз Педаґоґийним заводом Войводини, а перши раз того року – и зоз Републичним педаґоґийним заводом Републики Сербскей, хтори на тим сайму тиж представи свойо активносци.
Саям и на тот завод орґанизовал «Дарунок-бависко» за шицких хтори реґистровани як учашнїки. Найщешлївших добитнїкох очекує лаптоп, таблет рахункар або мобилни телефон. Шицки заинтересовани ше годни приявиц по пияток, 26. марца, по 16:00 годзин, на платформи ExpoOnline.rs. Участвованє на сайму безплатне и часово є нє огранїчене.
