Почина упис дзецох до першей класи
Упис дзецох до першей класи основней школи за школски 2021/2022. рок почина нєшка, на штварток, 1. априла 2021.
Родичи и того року годни по електронскей драги заказац термин за упис и тестированє дзецка до першей класи основней школи, з активованьом услуги еЗаказованє на Порталу еУправа, хтора доступна од 22. марца.
Перши подпредсидатель Влади и министер просвити, науки и технолоґийного розвою Бранко Ружич виявел же родичи нє муша приношиц документацию за упис, алє же тоту документацию обезпечує школа на електронски способ.
«На тот способ зашпоровали зме родичом час и пенєжи и понукли им потребну потримовку у тим важним моменту. Уж першого тижня родичи заказали термин за коло 14 одсто будуцих першокласнїкох», гварел министер Ружич.
Достаточне же би родитель на електронски способ заказал термин, приведол дзецко у заказаним термину и же би зоз собу вжал лєм особну леґитимацию. Шицки потребни документи школа обезпечи на електронски способ – вивод зоз матичней кнїжки народзених, уверенє о месце биваня, уверенє о нащиви предшколскей програми и потвердзенє о оконченим лїкарским препатрунку, односно лїкарске уверенє. Кед препатрунок окончени у приватного лїкара, потребне же би родитель тото уверенє вжал и принєсол го до школи.
До першей класи ше упише кажде дзецко хторе по початок школского рока ма найменєй шейсц и пол, а найвецей седем и пол роки. У школским 2021/22. року, упис до першей класи обовязни за шицки дзеци народзени од 1. марца 2014. по 28. фебруар 2015. року.
Розгварку зоз дзецком у школи окончи психолоґ, односно педаґоґ школи на мацеринским язику дзецка, зоз применьованьом стандардних поступкох и инструментох, яки препоручел компетентни завод, односно овласцени фахово орґанизациї.
По податкох Републичного заводу за статистику, 66.864 дзеци доросли за упис до першей класи основней школи у 2021/2022. року, а урядово податки РЗС о облапеню дзецох буду доступни концом априла 2021. року.
Упис школярох тирва по 31. май, а школи годни окончовац упис и по тим датуму.
Кед родитель ма додатни питаня у вязи зоз заказованьом термину, може контактовац контакт центер Министерства просвити, науки и технолоґийного розвою на 011/73-505-57 од 8.00 по 15.00 годзин.
Жридло: Министерство просвити, науки и технолоґийного розвою