Шветочне додзельованє наградох за найлєпши роботи на Конкурсу за вибор фотоґрафскей роботи на тему «Огнїско наших предкох» и Конкурсу за вибор лоґа и плаката проєкту «Афирмация мултикултурализма и толеранциї у Войводини»
Нєшка, у Белавим салону покраїнскей влади шветочно додзелєни награди автором найлєпших роботох у рамикох проєкту «Афирмация мултикултурализма и толеранциї у Войводини».
Форум за едукацию, сотруднїцтво, афирмацию и потримовку гражданскому дружтву( у дальшим тексту: ФЕСАП) у сотруднїцтве зоз Покраїнским Секретариятом за образованє, предписаня, управу и национални меншини – национални заєднїци (у дальшим тексту: Секретарият) у априлу того року розписал два конкурсни линиї, єдну за школярох основних школох зоз шедзиском у АП Войводини за вибор фотоґрафскей роботи «Огнїско наших предкох», а другу за школярох штреднїх школох зоз шедзиском у АП Войводини за вибор дизайнерского ришеня лоґа и плаката проєкту «Афирмация мултикултурализму и толеранциї у Войводини».
«Секретарият роками реализує проєкти у обласци афирмациї мултикултурализму и толеранциї у Войводини. Наш заєднїцки циль очувац идентитет националних меншинох – националних заєднїцох и стимулованє духа медзиетнїчней толеранциї при омладину школского возросту», визначела Милинка Хртян, о.д. помоцнїци покраїнского секретара за национални меншини – национални заєднїци.
У рамикох наведзених конкурсох, авторски материял требал виражиц автентични и особни попатрунок на етнїчни рижнородносци або културни специфичносци етнїчних заєднїцох зоз АП Войводини.
«Док сом вожел бициґлу замерковал сом памятнїки, хтори характеристични за мой валал, и пришол сом на идею же бим указал огнїско моїх предкох. За мнє значне же бим дацо цо сом нашлїдзел од моїх предкох, зачувал за будучносц», гварел Арон Мате, хтори достал першу награду на конкурсу за вибор фотоґрафскей роботи на тему «Огнїско наших предкох».
«Толеранция би мушела буц вецей заступена медзи младима, же бизме функционовали як заєднїца, насампредз же бизме були зєдинєни», гварела Єлена Купрешки, хтора достала першу награду на конкурсу за вибор дизайнерского ришеня лоґа и плаката проєкту «Афирмация мултикултурализма и толеранциї у Войводини».
