Винчованка з нагоди початку школского 2023/2024. року
Почитовани просвитни роботнїки и колеґове, мили нашо школяре!
Жадам вам щешлїви и успишни початок нового школского року и рок з вельо добрих резултатох.
Жаданє за здобуваньом нових знаньох нє шме нїґда скапац. Барух Спиноза раз гварел же хиба при велїх людзох же сцу буц учителє другим, а мушели би ище длуго остац школяре.
Мили школяре, школа нє проблем. То ваш други дом, место друженя, бависка и ученя, и место хторе вам помогнє вироснуц до людзох яки буду меняц швет. Най вас водзи здобуте знанє и жаданє за твореньом даяких нових драгох за ґенерациї хтори приходза. Школа дзецом нє понука лєм образованє, алє и нагоду же би розвивали тирваци людски вредносци – колеґиялносц, прилапйованє взаємних розличносцох, доброту и чувствительносц.
Школованє може буц и виглєдованє – полне спокусох и препреченьох яки потребне звладац. Пестуйце любопитлївосц, почувствуйце радосц яку вам ученє годно подаровац. Приятельство часто животу дава найглїбши и найкрасши мелодиї. У школи ше здобува вельки приятельства и случую перши любови, яки ше памета през цали живот. Прето, уживайце у тих найкрасших, школярских часох, пестуйце приятельства и почитуйце розличносци. Попробуйце жиц на способ же бисце не страцели свою окремносц, алє же бисце ю збогацели и офарбели з добрима дїлами, благодарносцу и любову.
Директоре, наставнїки, фахово сотруднїки и родичи, ми одвичательни за креированє безпечного и стимулуюцого окруженя за ученє и розвой шицких членох школскей заєднїци. У планованю и реализациї образовно-воспитней роботи у школским 2023/2024. року, окремна увагу ше пошвеци реализациї програми защити од насилства, малтретованя и занєдзбованя и програми зопераня дискриминациї и розличних справованьох, бо школа муши буц сиґурне место за шицких школярох, наставнїкох и занятих.
Школованє нас пририхтує же бизме ше зочели зоз спокусами яки нас очекую у животу и з добрей часци опредзелює нашу будучносц. Праве прето, винїмкова улога просвитних роботнїкох хтори би школярох на тей драги мали потримац, защициц, алє и унапрямиц и оспособиц же би єдного дня могли самостойно управяц зоз своїм животом. Тота улога наисце одвичательна, алє є и уникатна и велїчезна.
Верим до вашей моци и ентузиязму на початку школского року и вєдно зоз своїма сотруднїками, жадам вам вельо успиху у дальшей роботи.
ПОКРАЇНСКИ СЕКРЕТАР,
Жолт Сакалаш