60 милиони динари за набавку видео-надпатрунку у покраїнски школох
Подпредсидатель Покраїнскей влади, покраїнски секретар Роберт Отот уручел нєшка контракти, у вредносци 60 милиони динари, за набавку опреми за видео-надпатрунок и опреми за повязованє з просторию за мониторинґ. Средства опредзелєни 42 штреднїм школом зоз териториї АП Войводини.
«Тот конкурс перши раз розписани прешлого року – у вредносци двацец милиони динари хтори наменєни основним и штреднїм школом. Гоч то значна потримовка, того року зме препознали же можеме и мушиме зробиц вецей, та вредносц конкурсу тераз три раз векша. Першенство мали школи хторим локална самоуправа будзе финансовац опреманє просториї за мониторинґ. На таки способ указуєме же безпечносц и одвичательносц заєднїцки приоритети – як школох, так и локалних заєднїцох.» – виявел подпредсидатель Покраїнскей влади, покраїнски секретар Роберт Отот.
У рамикох шветочного додзельованя Отот визначел важносц тройнїстого звекшаня средствох за набавку видео-надпатрунку за єден рок.
«Безпечносц дзецох представя фундамент їх будучносци. Покраїнска влада остава пошвецена даваню потримовки и планує звекшанє средствох же би ше обезпечели найлєпши условия за школованє. Идуцого року, право участвовац на конкурсох буду мац и основни школи. Попри стараня о безпечносци, предлужиме и зоз укладанями до школских обєктох. Обновйованє и модернизация школох, як и вибудов нових учальньох, спортских салох и других обєктох од ключней значносци за унапредзованє образованя. Циль нам же би школи були безпечни и приємни, з оптималнима условиями за роботу и ученє. Укладаня до образовней инфраструктури то укладанє до будучносци наших дзецох и нашей заєднїци. – заключел Отот.
Конкурс бул розписани од 6. по 20. септембер 2024. року. Сцигли вкупно 55 прияви (54 прияви поднєсли штреднї школи, а єдну прияву поднєсла установа школярского стандарду), од хторих 42 виполньовали условия за додзельованє средствох.
