Уручене покраїнске припознанє у обласци людских и меншинских правох «Людевит Мичатек»
Подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот додзелєл нєшка покраїнске припознанє у обласци людских и меншинских правох «Людевит Мичатек» директорки Основней школи «Здравко Ґложански» зоз Бечею Лидиї Стойшич.
Секретар Отот з тей нагоди здогаднул же ше тото припознанє додзелює за анґажованє и посцигнути резултати у обласци защити людских и меншинских правох, унапредзеня толеранциї, єднакосци и ровноправносци.
«Ваша школа, найвекша и найстарша двоязична школа у општини Бечей, указала винїмкову витирвалосц у инклузивним образованю, борби процив каждей форми дискриминациї дзецох, як и у почитованю култури розличносцох у каждодньовим образовним процесу», гварел Отот и додал же ше тота образовна институция, зоз численима проєктами, закладала за инклузивносц, толеранцию и свидомосц о значносци демократскей култури у нашим дружтву.
Вон визначел же ОШ «Здравко Ґложански» позната по иновацийним духу, визиї и потреби же би ше нєпреривно усовершовала, як и порихтаносци буц ментор другим школом и постац установа за приклад кед слово о потримовки дзецом зоз чувствительних ґрупох у транзициї.
«Зоз додзельованьом того припознаня жадаме наградзиц вашо нєсебични усиловносци и пошвеценосц у роботи зоз дзецми. Жадаме же бисце знали же вашо усиловносци препознати и ценєни», поручел секретар.
Отот наглашел же покраїнски припознаня запровадзени же би ше пестовала култура препознаваня и почитованя найлєпших медзи нами, и же би ше зоз заєднїцким анґажованьом у обласци людских и меншинских правох и образованя вибудовало лєпше дружтво.
