media
РЕПУБЛИКА СРБИЈА
АУТОНОМНА ПОКРАЈИНА ВОЈВОДИНА

Покрајински секретаријат за образовање, прописе, управу и националне мањине – националне заједнице

Правосудни испит

Покраїнски секретарият за образованє, предписаня, управу и национални меншини – национални заєднїци орґанизує покладанє правосудних испитох за кандидатох хтори маю место биваня на териториї АП Войводини.

Актуални термини за покладанє правосудного испиту
Обвисценє – вибор испитного одбору
Обвисценє – пременка испитного термину
Обвисценє – Виновне право
Обвисценє – часц гражданского права у писаней форми
Oбвисценє – обласц вивершеня и обезпеченя

НАДПОМНУЦЕ:
Строго забранєне уношенє мобилних телефонох, телекомуникацийних средствох и апаратох за знїманє до будинку суда под час отримованя правосудного испиту.
При уходзе до будинку суда, будзе ше контроловац пошедованє мобилних телефонох и других нєдопущених средствох. Кед ше утвердзи же их особа уноши, будзе єй онєможлївене присуствовац на правосудним испиту.
Тото правило важи за кандидатох хтори покладаю правосудни испит, як и за шицки особи хтори присуствую на испиту.


Испитни одбори хтори покраїнски секретар оформел тоти:

Перши испитни одбор
1. Милан Ткалец (предсидатель) – Виновне право;
2. Др Зоран Лончар – Управне право
3. Ерне Беренї – Роботне право;
4. Михаль Нїлаш – Гражданске право;
5. Тамара Радович – Тарґовинске (привредне) право;
6. Др Марияна Дукич Миятович – Медзинародне приватне право;
7. Др Слободан Орлович – Уставне право и правосудне орґанизацийне право.

Други испитни одбор
1. Ференц Молнар (предсидатель) – Виновне право;
2. Райко Марич – Управне право;
3. Др Александар Радованов – Гражданске право;
4. Слободан Сремчев – Тарґовинске (привредне) право;
5. Борислав Шушняр – Роботне право;
6. Мр Бела Миавец – Медзинародне приватне право;
7. Зоран Вучевич – Уставне право и правосудне орґанизацийне право.

Правосудни испит ше орґанизує през цали рок (окрем у юлию и авґусту) пред обидвома испитнима одборами, найчастейше штредком мешаца (часц у писаней форми) и концом мешаца (усну часц испиту).

Правосудни испит єдинствени и составени є з часци у писаней форми и усней часци. Кандидати длужни у истим термину покладац обидва часци правосудного испиту (часц у писаней форми и найменєй штири предмети з усней часци).

Кандидат за покладанє правосудного испиту то особа хтора дипломовала на правним факултету и хтора по законченим правним факултету здобула два роки роботного искуства на роботох правного фаху у суду, явним тужительстве, явним правобранїтельстве и адвокатури, або три роки роботного искуства на роботох правного фаху у орґану за потупеня, другим державним орґану, орґану териториялней автономиї и локалней самоуправи, або штири роки роботного искуства на роботох правного фаху у подприємстве, установи або другей орґанизациї.

Вимаганя кандидатох за покладанє правосудного испиту ше доручує по пошти або нєпоштредно − у примацей канцелариї писарнїци, до 15. у чечуцим мешацу за испитни термин у шлїдуюцим мешацу (наприклад, по 15. септембер за октоберски испитни термин).

Вимаганє за покладанє правосудного испиту Превежнї
Вимаганє за додатне покладанє правосудного испиту Превежнї

Кандидати хтори перши раз покладаю правосудни испит, прикладаю ґу вимаганю тоти докази:
1. уверенє о роботним искустве (потвердзенє суду, адвокатскей комори, тужительства, орґана або орґанизациї);
2. оверену фотокопию дипломи правного факултету;
3. оверену фотокопию першого и другого боку особней леґитимациї (або оверени вивод одчитаней особней леґитимациї з чипом);
4. потвердзенє министерства цо компетентне за роботи правосудства же кандидат нє покладал правосудни испит у остатнїх двох рокох пред испитнима одборами хтори формує министер (лєм за кандидатох хтори у остатнїх двох рокох пременєли место биваня зоз териториї вонка з АП Войводини на єй територию).

Кандидати хтори додатно покладаю правосудни испит подноша лєм вимаганє за додатне покладанє.
Кандидати хтори други раз покладаю правосудни испит, ґу вимаганю прикладаю лєм доказ хтори горе наведзени под шорним числом 3.
Кед достанє одобренє за покладанє правосудного испиту, кандидата ше з ришеньом обвисцує о датуме покладаня часци у писаней форми, односно усней часци испиту, як и о числох рахунку буджету АП Войводини и буджету Републики Сербиї на хтори ше уплацує надополнєнє за покладанє испиту и републичну административну таксу.

Надпомнуце: шицки акти у писаней форми (ришеня о одобреним покладаню, обвисценя, увереня о положеним испиту и так далєй) ше доручує на адресу места биваня (адресу хтора назначена у особней леґитимациї), окрем кед на вимаганю виключно нє наведзена друга адреса (адреса места пребуваня) на хтору кандидат жада же би ше му доручовало акти у писаней форми, або кед у вимаганю виключно нє наведзене же кандидат особнє превежнє акти у Секретарияту. Кандидат длужен навесц точну адресу.
Кед на адреси места биваня або адреси места пребуваня кандидат нє познати и нє можлїве му доручиц акт у писаней форми, доручованє ше окончи з прибиваньом того акту на огласну таблу Секретарияту.

Надополнєнє за покладанє правосудного испиту ше уплацує по доставаню ришеня з яким ше одобрує покладанє испиту, а пред покладаньом часци испиту у писаней форми ше секретарови доручує доказ о оконченим уплацованю.

УПУТСТВО ЗА КАНДИДАТОХ ПРИ ПОКЛАДАНЮ ИСПИТУ

За виробок писаней роботи ше хаснує лєм оверени папер хтори ше достава од секретара одбору на самей часци испиту у писаней форми, вєдно зоз задатком. Концепт роботи мож писац на обичним паперу.
Задатак ше обовязно враца по законченим писаню роботи.
Писану роботу ше пише зоз писанима або друкованима буквами, читко, лєм зоз хемийним клайбасом. Виправки дошлєбодзени (прешмарґованє, додаванє, хаснованє билїдла), при чим треба водзиц рахунку же би робота була шорова и преглядна за випитовача и филолоґа хтори ю буду препатрац.

Приклад задатку з часци испиту у писаней форми з Виновного права Превежнї

На часци испиту у писаней форми зоз Гражданского права ше достава, по правилу, судски предмети.

На часци испиту у писаней форми мож хасновац одвитуюци предписаня.
У чаше док тирва испит у писаней форми забранєне виходзиц зоз просториї у хторей ше отримує испит.

Под час тирваня испиту (у писаней форми и усней) забранєне хасновац мобилни телефони, рахункари и други комуникацийни пошореня з хторима ше можу витвориц нєзаслужени резултати.

О положеним правосудним испиту ше видава УВЕРЕНЄ хторе ше кандидатови доручує на адресу места биваня, або – кед то ясно наглашене у вимаганю – на адресу места пребуваня, односно особно доручує у Секретарияту. Кандидат ма право же би ше му видало двоязичне уверенє, тє. Уверенє на сербским язику и на єдним з язикох националних меншинох – националних заєднїцох хтори ше службено хаснує у АП Войводини.

Покладанє усней часци правосудного испиту явне – заинтересовани особи можу присуствовац на усней часци испиту. Особи хтори слухаю правосудни испит длужни свойо справованє приподобиц ґу значносци и природи испиту. Култура справованя на правосудним испиту подрозумює, насампредз, почитованє кандидатох хтори покладаю испит, односно стримованє од онєможлївйованя випитованя (бешедовац у просториї у хторей ше поклада испит, виходзиц зоз просториї под час викладаня кандидатох и подобне).

У просторийох у хторих ше поклада испит ше находза пошореня за детектованє сиґналох мобилних телефонох и других бездротових пошореньох. У чаше тирваня испиту мобилни телефони ше муши цалком виключиц, а нє лєм уцихнуц.

Шицки додатни информациї можеце достац од секретарох испитних одборох:
Ивана Бороєва, канцелария I/68; число телефона 021/487-4383, 060/515-90-52;
e-mail: ivan.borojev(at)vojvodina.gov.rs
Дияна Катона, канцелария I/65; число телефона 487-4427; e-mail: dijana.katona@vojvodina.gov.rs.

Закон о правосудним испиту („Службени глашнїк РС”, число 16/97) Превежнї
Правилнїк о програми правосудного испиту („Службени глашнїк РС”, число 51/97) Превежнї
Правилнїк о покладаню правосудного испиту („Службени глашнїк РС”, число 14/98, 88/2008 и 108/2012) Превежнї

Службени евиденциї

Шицки меновнїки хтори у тим тексту похасновани у хлопским роду, а маю и женски род, подрозумюю источашнє и тоти исти меновнїки у женском роду.

10.01.2019